အခွင့်အရေးမကောင်းတဲ့ကြားက အောင်မြင်အောင်လုပ်

အခွင့်အရေးမကောင်းတဲ့ကြားက အောင်မြင်အောင်လုပ်

 အခွင့်အရေးကောင်းတွေ ရှိနေတဲ့အချိန်မှာ အောင်မြင်အောင် လုပ်ဆောင်ဖို့ဆိုတာ လူတိုင်း လုပ်နိုင်ပေမဲ့ အခွင့်အရေး မကောင်းတဲ့၊ ခက်ခဲတဲ့အခြေအနေတွေကြားထဲက အောင်မြင်အောင် လုပ်ဆောင်ဖို့ကတော့ အင်မတန် ခက်ခဲပြီး လူတိုင်း မလုပ်နိုင်ပါဘူး။
 မြတ်စွာဘုရားလောင်းတော်သည်ပင်လျှင် လေးသင်္ချေနှင့် ကမ္ဘာတစ်သိန်း ပါရမီဖြည့်ခဲ့စဉ်က သာသနာနှင့် ကြုံတွေ့ခဲ့ရသည်မှာ (၂၄) ဘဝသာရှိခဲ့ပြီး ကျန်ရှိသော ဘဝအများစုမှာ သာသနာကွယ်ပချိန်၊ လူဆိုး၊ သူခိုးများ ပေါများချိန်နှင့် ဘုရားမပွင့်သော ကမ္ဘာများ၌သာ ပါရမီဖြည့်ဆည်းခဲ့ရတာ ဖြစ်ပါတယ်။
 ပါရမီဖြည့်သည်ဆိုသည်မှာ -
• လူကောင်းများကြား၊ အရာရာ ပြည့်စုံငြိမ်းချမ်းနေသည့် ပတ်ဝန်းကျင်၌သာ လုပ်ဆောင်ရခြင်း မဟုတ်ပါ။
• မကောင်းသော အခြေအနေ၊ ခက်ခဲသော ပတ်ဝန်းကျင်ဆိုးများကြားမှ အကောင်းဖြစ်အောင်၊ အကျင့်သီလ ပြည့်စုံအောင် ကြိုးစားတည်ဆောက်ခြင်းကိုပင် "ပါရမီဖြည့်သည်" ဟု ခေါ်ဆိုခြင်း ဖြစ်ပါတယ်။
 မိမိကိုယ်ကိုသာ ပြန်လည်ဆန်းစစ်ခြင်း
တိုင်းပြည် သို့မဟုတ် ပတ်ဝန်းကျင် အခြေအနေများ မည်မျှပင် ပျက်စီးဆုတ်ယုတ်နေပါစေ၊ ထိုအကြောင်းအရာများကိုချည်း အပြစ်ပြော ရေရွတ်နေရုံဖြင့် မပြီးဘဲ အဓိကမှာ မိမိ၏ ပုံရိပ်နှင့် ဘဝကို မိမိကိုယ်တိုင်သာ ပုံဖော် ဖန်တီးယူရမှာဖြစ်တယ်။

ဆရာတော်ဦးဇောတိသာရ